Wednesday, August 26, 2020

አሠሪና ሠራተኛ ህግ --የመንፈሳዊ አገልግሎት ሰጪ ሰራተኞች- ሰ/መ/ቁ. 38331

 

የሰ/መ/ቁ. 38331

የካቲት 17 ቀን 2001 ዓ.ም

ዳኞች፡- ዓብዱልቃድር መሐመድ

       ሐጐስ ወልዱ

       ሂሩት መለሰ

       በላቸው አንሺሶ

       ሱልጣን አባተማም

አመልካች፡- በኢትዮጵያ ኦርቶዶክስ ተዋህዶ ቤተክርስቲያን በባሌ ሐገረ ስብከት የጐባ ቅዱስ ገብርኤል ቤተክርስቲያን - ነገረ ፈጅ ቴዎድሮስ አረፈአይኔ ቀረቡ

ተጠሪ፡- መሪጌታ መርዓዊ ስዩም

      መዝገቡን መርምረን የሚከተለውን ፍርድ ሰጥተናል፡፡

ፍ ር ድ

      በዚህ ጉዳይ ለሰበር ችሎት የቀረበው ክርክር የሃይማኖት ወይም የመንፈሳዊ አገልግሎት የሚሰጡ ሰራተኞች ከሐይማኖት ተቋሙ ጋር ያላቸው የስራ ግንኙነት በአሰሪና ሰራተኛ አዋጅ የሚሸፈን መሆን አለመሆኑን የሚመለከት ነው፡፡

      ተጠሪ በአመልካች ቤተክርስቲያን መንፈሳዊ አገልግሎት የሚሰጡ ሲሆኑ በኦሮሚያ ብ/ክ/መ/በጐባ ወረዳ ፍ/ቤት ባቀረቡት ክስ ቤተክርስቲያንዋ ያለአግባብ ከስራ ስላሰናበታቻቸው ደመወዝ ተከፍሎአቸው ወደ ስራቸው እንዲመለሱ ጠይቀዋል፡፡ ክሱ የቀረበለት ፍ/ቤትም የግራ ቀኝ ወገኖችን ክርክር ከሰማ በኋላ፣ጉዳዩ የመንፈሳዊ አገልገሎት በመስጠት የተሰማሩትን ሰዎች የሚመለከት በመሆኑ በአሰሪና ሰራተኛ ጉዳይ አዋጅ የሚታይ አይደለም በማለት የወሰነ ሲሆን፣ በዚህ ላይ ይግባኝ የቀረበለት የከፍተኛ ፍ/ቤትም ውሳኔውን አጽንቶአል፡፡ በሌላ በኩል ደግሞ ተጠሪ ይህን ውሳኔ በመቃወም ለኦሮሚያ ብ/ክ/መ/ጠ/ፍ/ቤት ሰበር ችሎት አቤቱታ በማቅረባቸው በዚህ ደረጃም ክርክሩ ተሰምቶአል፡፡ በመጨረሻም ችሎቱ በስር ፍ/ቤቶች የተሰጠትን ውሳኔዎች በመሻር ጉዳዩ በአሰሪና ሰራተኛ ጉዳይ አዋጅ ሚታይ ነው በማለት ወስኖአል፡፡ የሰበር አቤቱታው የቀረበው በዚህ ላይ ነው፡፡

      ይህ የሰበር ችሎትም የሐይማኖት ወይም የመንፈሳዊ አገልግሎት የሚሰጡ ሰራተኞች ከሃይማኖት ተቋሙ ጋር ያላቸው የስራ ግንኙነት በአሰሪና ሰራተኛ ጉዳይ አዋጅ ይሸፈናል? ወይስ አይሸፈንም? የሚለውን የሕግ ነጥብ መሰረት በማድረግ አቤቱታ የቀረበበትን ውሳኔ መርምሮአል፡፡

      የሰበር ችሎቱ በመ/ቁ. 18419 ግንቦት 4 ቀን 1998 ዓ.ም በሰጠው ውሳኔ አግባብነት ያላቸውን የሕጉን ድንጋጌዎች በመተርጐም አንድ የሐይማኖት አገልግሎት የሚሰጥ ሰራተኛ ከሃይማኖት ተቋሙ ጋር ያለው የስራ ግንኙነት በአሰሪና ሰራተኛ ጉዳይ አዋጅ የሚሸፈን አለመሆኑን በመግለጽ የሕግ ትርጉም ሰጥቶበታል፡፡

      በመሆኑም በዚህ ጉዳይ የኦሮሚያ ብ/ክ/መ/ጠ/ፍ/ቤት የሰበር ችሎት ተጠሪ ያቀረቡትን ጥያቄ በአሰሪና ሰራተኛ ጉዳይ አዋጅ ቁ. 377/96 የሚሸፈን አይደለም ውድቅ ማድረግ ሲገባው ጉዳዩ በዚህ ሕግ የሚሸፈን ማለቱ ውሳኔው በሕግ ረገድ ስህተት ያለበት ሆኖ ተገኝቶአል፡፡

ው ሳ ኔ

1.  የኦሮሚያ ብ/ክ/መ/ጠ/ፍ/ቤት ሰበር ችሎት በመ/ቁ. 48401 መጋቢት 29 ቀን 2000 ዓ.ም የሰጠው ውሳኔ በፍ/ብ/ሥ/ሥ/ሕግ ቁ. 348/1/ መሰረት ተሽሮአል፡፡ ይፃፍ፡፡

2.  የተጠሪ ክስ (ጥያቄ) በአሰሪና ሰራተኛ ጉዳይ አዋጅ የሚሸፈን አይደለም ብለናል፡፡

3.  ወጪና ኪሣራ በተመለከተ ግራ ቀኝ ወገኞች የየራሳቸውን ይቻሉ፡፡ መዝገቡ ይመለስ፡፡

                                      የማይነበብ አምስት ዳኞች ፊርማ አለበት

ቤ/ኃ

No comments:

Post a Comment